Polîsan bêtehamulî nîşanî pankarta Kişanak û Anli da

2016-10-27 17:53:23

AMED (DÎHA) - Pankartê şermezarkirina Hevşaredarên Şaredariya Bajarê Mezin a Amedê Gultan Kişanak û Firat Anli ku li avahiya şaredariyê hat daliqandin ji aliye polîsan ve hat daxistin. 

Li dijî binçavkirina Hevşaredarên Şaredariya Bajarê Mezin a Amedê Gultan Kişanak û Firat Anli çalakiya nobetê ya xebatkarên şaredariyê û gel didome. Xebatkarên Şaredariya Amedê ji bo binçavkrina hevşaredarên xwe şermezar bikin, li avahiya şaredariyê pankarta bi nivîsa “Bila li hember vîna gel rêz bê girtin û hevşaredarên serbest bên berdan” ku wêneyên Kişanak û Anli li ser bû daliqandin. 

Piştî pankart hat daliqandin demek kin şûn ve polîs derketin ser avahiyê bêtehamulî nişandan û pankart rakirin. Rojnamevanên dîmen û wêneyên rakirina pankartê dikişandin ji aliyê polîsan ve hatin astengkirin. 

Pankart bû sedem binçavkirinê

Polîsan têkildarî daliqandina pankart Alîkarên Sekreterê Şaredariya Bajarê Mezin a Amedê Necatî Pîrînçîoglu û Rojda Balkaş Akyuz û Seroka Daîreya Xizmeta Destekî ya Şaredariya Bajarê Mezin a Amedê Şiyar Nezan hatin binçavkirin. 

(kom/bg)