Berkîn nêy 130 rojo ke hewnê de yo!
STENBOL (DÎHA)- Dema qewimyayişî de Gezîyê polêsên AKPî bi bombeya gazî de Berkîn Elvan birîndar kerd bî, no dem ra hetanî 130 rojo ke Elvan hewnê de yo. Pîyê Berkîn Elvanî, Samî Elvan dîyar kerd gedeyê ey dewlet birîndar kerd û wina vat: "Senî beno dewlet cuyayişê gedeyê min destê ey ra gîna? Dewlet zaf bê wîjdan o û gedeyê min ma ra tepa bidêy."
Dema çalakîyên Gezîyê 13 hezîranî de Berkîn Elvan keyeyê xo ra seba nan girewtişî vejîya bî û la no demî de zî polêsên AKPî çalakwanan ra hêriş kerdinê û yew kapsula bombeya gazî ame sareya Elvanî ra gîna. No demî ey Nêweşxaneya Okmeydanî ra wedarnaybîy û nika 130 rojo Elvan nêweşxaneyê odeya girîya lezî de maneno. Malbatê ey zî 130 rojo ke paweyenîy ke gedeyê înan hewnê ra wardo.
Agahî zî nedonêy'
Rewşa Elvanî ser pîyê ey Samî Elvan agahî da û vat ke înan hele zî nêzonêy rewşa gedeyê înan weş beno, nêbeno û wina vat: "Gedeyê min polêsên dewletî birîndar kerdîy û la hele zî dewlet no rewşî înkar kena. Ez veng dona; qetilên gedeyê min kamêy se? ganî bêro aşkera kerdişî. Senî beno dewlet cuyayişê gedeyê min destê ey ra gîna? Dewlet zaf bê wîjdan o û gedeyê min ma ra tepa bidêy. Nêy 130 rojo ke ma nêweşxaneyî de rawkenêy û wardenîy."
Pawitoxa Malbatê Elvanî Denîz Karatana zî mijar ser vat ke înan peynîya qewimyayişê heqê polêsan de ser sûcî day û nînan ard ziwan: "La belê no ser dayiş sûcî da qet averşîyîş çînyo. Ma seba aşkera bîyîşa şikkerdoxan ser qeydên kamerayî û hûmarîya sîcîla polêsan waştêy. La nêy waştişan dema derg nêame verpers dayişî. Ma no demî Mudirîyeta polêsî ra waştişnameyî daybî û verpersa xo de zî mudîrîyet vatbî ke; no demî de ma qet no herêmê de polêsan ra wezîfe nêday û hewna no herêmê de qeydên kamerayî ma çînyo. Ez bawera ke no cipersayişî de averşîyîş nêbo. Çimkî hem emnîyet hem zî dozgerî no mijarê de karê xo nêkenîy. La ma no dozî de netîce nêgîy se, ma do DHMEî ra serpero bîdîy.
Karatana dîyar kerd ke no qewimyayişî de esas berpirsîayaran kam emîr day se, înan berpirsîyarêy û wina qedna: "Wezareta Karê Zereyî seba şixulnayişa bombeyên gazî polêsî ra wezîfe daya û la polêsan zî bi taybetê 1 gulane 2013'ê ra hetanê nika no gazan çalakwanîy ya kişenîy ya zî birîndar kenîy. No ser zî kam no wezîfa dayo se esas berpirsîyar înan o, yanî berpirsîyar Serekwezîr û Wezareta Karê Zereyî yo. Yanê tena polêsan berpirsîyar nînêy. No ser çi ganî bikero se ma bikerîy û berpirsîyaran zî cezayî xo bioncîy."
(ad/mae)
