Dadgeh dest eşt karê îdareya zîndanî zî!
ENQERE (DÎHA) - Dadgeha Ceza Giran a 5'ina Amedî biryara skandalî ra îmze eşt. Îdareya Zîndanî heqê mehkûmê azadîyê Necdet Bozkurtî de Dadgeha Ceza Giran a 5'ina Amedî ra rapor xo erşawit û raporê xo de zî dîyar kerd ke Bozkurt eşkîyena bêro veradayişî. La belê Dadgeh zîndanî de Bozkurt çi cezaya dîsîplînî girewt o se, hincet mojnay û Bozkurt tehlîye nêkerd.
Necdet Bokurt mehkûmê azadîy o û Zîndana Tîpa D a Amedî de manena. Bozkurt zîndan û dadgehan de çi nêheqîyan ke bena, no ser name DÎHAyê ra eşrawit o.
Mehkûmê Azadîyî Necdet Bozkurt nameyê xo de dîyar kerdo ke ey normalî de 17 temmuze de biameynê veradayişî, biryara tehlîyeya ey 30 êlule ra ameya taloq kerdişî û nameyê xo wina vato: "Hewna 30 êlule ameya, la hewna nêameyo tehlîye kerdişê. Ez zî meraq kerd, çimkî ez zanena ket ehlîye bîyîşî min ra qet astengî çînya."
Mehkûmê Azad Bozkurt dîyar kerd ke Zîndana Tîpa D a Amedî 30 êlule de seba tehlîye bîyîşê ey ser Dadgeha Cezaya Giran a 5'ina Amedî dosyayê ey eşrawit o û wina domna: "La dadgeh zî biryara xo de vana ke: "Bi şertî de nîno serbest veradayişî' yanî dadgeha ser xo vana ke: "Belkî îdareya zîndanî heqê Bozkurtî de biyara islahî dayao, la belê çimê min de Bozkurt islah nêbîyo.' Ez bawera ke şima zî şaştê mendîy. Çi heyfo ke dadgeh esîl karê xo veradayo û karê îdareyê zîndanî ra dest eşt o."
Mehkûmê Azad Bozkurt aşkera kerd ke dadgeha ser xo îdareya zîndanî heqê ey cezaya dîsîplînî dayo ke nêy cezayan biryarê xo de hincet mojnayo û nînan ard ziwan: "Biryara dadgehî de raştê çînyo. Çimkî min heme cezaya dîsîplînî ke îdareya zîndanî min ra dayo, qedyayo û tay cezayê dîsîplînî min zî bi çarçeweya Paketa Darazîya 4'in de ameya efê kerdişî. Hetta îdareya zîndanî zî raporê xo de hetê min de vindert o. Dadgeh min ra nêheqî kerda.
Bozkurt dest nîşan kerd ke dema vîyarteyî de qet dadgehan cezayê dîsîplînî elaqedar nêbîynê, nika wazenîy bi rêbazî de destê dadgehan de cezayê dîsîplînî meşrû bikerîy û wina domna: "Zatî ez hetanê nika 6 heb tena cezaya dîsîplînî girewt a. Nêy cezayan ez qedînaya. Heme nêy cezayê dîsîplînî zî dema greva veyşanî de min girewtbî. Tena min ra 60 kesîy ra zî nêy cezayan ra day û nêy kesan zî nika tehlîye bîy. 30 êlule ra hetanî nika ez cezayê xo onta, la bêhuqûqî de min zîndanî tepişenîy. Dadgeh hincetê xo de zî cezayê dîsîplînî mojnaya. Ez no ca ra wekîlê BDPî veng dona, rewşê min ganî Wezareta Edeletî ra bipersîy."
(ad)
