Lejkerey awe Dîcleye gamar kena
EHMET BIRA
AMED (DÎHA) - Binê Amedî de nezdîyê Pirda Desberine de awa kanalîsazyona Lejkereya Alaya Hewayî kuno Dîcleyî mîyan. Masewan Bulent Ozbek ney rewşe ra nêrazîbîyişê xo ard ziwan rayberan bi taybet zî wezareta dewletî ke wa ney problemî lezbilez çareser bikerê
Çemê Dîcleyî bi sehezaran serro ke herikyeno û cuyayiş dano dormeyê xo la merdimêy dormeyê ay de cuyenêy zaf rayan ay qilêr kerdêy û kenêy. Dîcle merdiman ra nêmiradyaya û her tim herikyayişê xo dewam kerda.
Her ke teknolojî aver şîyo zelalî û helalîya Dîcleyî nêmaneno, tewrêy maseyan û zindîy bînan vinî benêy û merdimî zî ney ra nesîbê xo genêy.
Binê Amedî de nezdîyê Pirda Desberine de awa kanalîsazyona Lejkereya Alaya Hewayî kuno Dîcleyî mîyan. Masewan Bulent Ozbek na rewşe ra nêrazîbîyişê xo ard ziwan û veng da rayberan bi taybet zî wezareta dewletî ke wa ney problemî lezbilez çareser bikerê û wina vat: “Tîya cayeke şaristanî yo û zaf tûrîstîy yenêy la semedo ke boye kanalîzasyonî yeno zaf rayan ez şahid bîya ke tûrîstîy lezbilez apeya remay.”
Awa kanalîzasyonî
Masewan Bulent Ozbek bi destê xo kanalîsazyona ke Lejkereya Alaya Hewayî ra yeno nîşan kerd û ard vîr ke no awa qilêr zaf nezdîyê Pirda Desberin o û amnanî wexta ke ameyo nêy cayan de geyrayo bi çim û goşê xo vînayo ke qefleyê tûrîstan zincîya xo boye ra girotêy û lezbilez niştê otoboza xo û remayê û wina dewam kerd: “Semedo ke boye yeno zafêreya tûrîstan remenêy an zî zaf nêmanenêy. Ez tîya ra veng dana rayberan û wezareta dewletî ke wa ney problemî çareser bikerê.”
Tewrên maseyê Dîcleyî
Masewan Bulent Ozbek nezdî 20 serro ke bi hawayê amatorî masewaney keno û di na babete de pispro o. Ozbek dîyar kerd ke Çemê Dicleyî zaf tewr mase û ajalîy cuyenêy û bin talûkeyî de yê. Ozbekî tewrên maseyan wina ard ziwan: “Çemê Dîcleyî wexta ke bi gemarin bibo zirar dano ajalên ke awî de, maseyên ke çemî û ajal û kesêy ke dormeyê çemî de geyrenêy. Eke wina bişêro tewrên maseyan; Siring, Behran / Faran, Berat, Şah, Zereke, Sazanê bi neynik, Çimsîya, Mercan, Yayin, Zûl, Pûlsûr, Bine, Masa Kerayan, Masa Herî, Devsor, Gumuş, Marmasî û hewna zaf tewrên ci Çemê Dîcleyî de yê awa gemarin ra talûkeya merdiş û cuyayişî ver de yê.”
Ozbekî dewam kerd û bal ant dorme û ekolojîya çemî wina domna: “Zereyê awî de maseyî tenê zirar nêvînenêy, req, beq, mirîcik, ajalêy dormeyê çemî de cuyayiş kenêy heme awa gemarin ya ke herikyeno Dîcleyî ra zirar vînenêy. No zî ekolojîya çemî xeripneno. Eke mudahaleyeke meyrokerdiş beno ke çend serrêy bîn tewrên maseyan ra zafêr qir bibêy û denge xirabe bibo.”
Gelîya Dîcle wa bibo seyrangeh
Ozbekî dergeya qisey xo de balt ant cayê tûrîstîk Pira Desberin û waşt ke no dorme bibo seryrangeha şaran û wina vat: “Ez wazena rayberîy wa bi hawayeke Çemê Dîcleyî pak bikerêy. Çimkî zereyê ey de çongê ra veşî celba sîya, lastikêy wesayitan, çapût û naylon tede estêy. Ame pakkerdiş ra pey ez wazena ke wa no ca bibo cayeke seyrangeha şaran û şar bi domanê xo bişikyê awa zelal de asnaw bikerê û ma zî awa zelal de maseyan bitepişê û biwerê û maseyan bi dil weşey biroşê.”
Ozbekî dergeya qisey xo de veng da rayberan ke wa zey şaristanê bînan biewnêy tîya û vat: “Edî bes o. Ez veng dana rayberan ke wa edî amedijî vanê beso, ma zî wazenêy weş cuyayiş bikê. Qey ma heq nêkerdo zey şaristanêy bînan bi her hawayî de pak û zelalî de bicûyê.”
(ab/mae)
