Serlêdanên 6’emîn pêşbaziya lîstikên şanoya kurdî didome
ZEYNEL BULUT - RAMAZAN OLÇEN
NAVENDA NÛÇEYAN - (DÎHA) Şanoya Bajar a Şaredariya Bajarê Mezin a Amedê (DBŞT) îsal 6’emîn Pêşbaziya Nivîsandina Lîstikên Şanoya Kurdî ya Ebdurrehîm Rehîmî Hekarî pêk tîne. Hevgerînendeyê Şanoya Bajar Ruknettîn Gun têkildarî pêşbaziyê û rewşa serlêdanan axivî.
Şanoya Bajar a Şaredariya Bajarê Mezin a Amedê (DBŞT), bi boneya ku nivîskariya lîstika kurdî bi pêş bixe û berê nivîskarên ciwan bide nivîsandina tekstên lîstikên şanoyê û her wiha bi mebesta ku lîstikên nû li lîteratura şanoya kurdî zêde bike û van xebatan li van civakê belav bike, Pêşbaziya Nivîsandina Lîstikên Şanoya Kurdî li dar dixe. Xelatên pêşwaziyê dê li ser navê nivîskar Ebdurrehîm Rehmî Hekarî ku yekem teksta şanoya kurdî ya bi navê “Memê Alan” nivîsandiye, bên dayîn.
Der barê xebatên ku heta niha hatine kirin û tên kirin de Hevgerînendeyê DBŞT'ê Ruknettîn Gun axivî. Gun destnîşan kir ku bereya juriya îsal a pêşbaziyê ji salên borî berfirehtir e, hem ji bakur hem jî ji başûr, rojava û rojhilatê Kurdistanê jî juriyên pêşbaziyê hene. Gun da zanîn ku ji çar parçeyên Kurdistanê nivîskar dikare bi berhemên xwe beşdarî vê pêşbaziyê bibin. Gun ev tişt li gotinên xwe zêde kir: “Hemû berhemên ku bên destên hevalên jûrî dê ji her parçeyekî 3 berhemên herî baş werin bijartin. Bi giştî 12 berhemên ku dê ji çar parçeyên Kurdistanê werin bijartinê dê derkeve ser dikê.”
Dê berhem bibin pirtûk
Encama nirxandina lijneyê dê di hefteya yekemîn a meha gulanê de bên diyarkirin. Encamên pêşbaziyê dê heman demê li ser malpera Şanoya Bajar jî bên daxuyandin. Xelatên pêşbaziyê dê ji bo sê (3) lîstikên herî baş bên dayîn. Ji bo her lîstikekê dê 3 hezar xelat bê dayîn. Gun da zanîn ku dê berhemên ku bên hilbijartin jî bikin pirtûk û ev agahî dan: “Lîstikên ku xelat wergirin dê ji hêla repertûara Şanoya Bajar ve bê nirxandin û dê di nav weşanên Şaredariya Bajarê Mezin a Amedê de wekî pirtûk bên çapkirin.”
Berhemên serkeftî dê weke lîstik were amadekirin
Gun der barê berhemên ku gihîştine ber destên wan jî ev agahî parve kir: “Heta niha tenê ji Bakur 6 berhem gihîştine ber destên me. Lê hêj dem heye. Piranî nivîskar berhemên xwe dihêlin rojên dawî. Ji ber ku dixwazin berhemên xwe bê kêmasî bişînin, bi caran dixwînin, didin xwendin û piştre dişînin.” Gund bi lêv kir ku li gorî şert û mercan û li gorî qeweta xwe ew ê hewl bidin ku berhemên serkeftî wekî lîstik amade bikin û derxin ser dikê. Gun got ku ew pê bawer in ku ew ê îsal serlêdan ji salên borî zêdetir bin.
Gun daxuyand ku berhemên ku rasterast bi kurdî tên nivîsandin û tên pêşandan ji aliyê gelê kurd û şanohezan ve rastî eleqeyeke mezin tên. Gun wekî mînak jî lîstika “Mem û Zîn” da. Gun, li ser lîstikên ku herî zêde tên temaşekirin û rastî eleqeyê tên jî got ku herî zêde lîstikên qerf û henekî tên pejirandin.
'Ji bo em balê bikşînin ser berxwedanê difikirin'
Gun di dawiya axaftinên xwe de li ser rewşa heyî ku em tê re derbas dibin jî axivî û wiha got: “Îro gelek geşedanên girîng diqewimin. Berxwedaneke bêhempa heye. Wekî gelek destanên di dîroka Kurdistanê de hatiye jiyîn û ji helbest, stran û pirtûkan re bûne mijar dê di şanoyê de jî cihê xwe bigire. Ji bo em balê bikşînin ser berxwedanê, em gelekî difikirin.”
Şertên beşdariya pêşbirkê
Ji bo peşbirkê şertên beşdariyê ev in:
1.) Serlêder di hilbijartina mijarê de serbest in. Dibe ku lîstik ji roman, çîrok, helbest, bîrewerî û hwd. bo şanoyê hatibin lêanîn.
2.) Nivîsên listikê divê herî kêm 30 hezar karakter bin û bi kompîtorê hatibin nivîsandin.
3.) Lîstikên ku tevlî pêşbaziyê dibin, divê heta dawiya serîlêdanê li tu derê nehatibin weşandin û li tu şanoyekê nehatibin lîstin.
4.) Her nivîskar herî zêde dikare bi lîstikekê beşdarî pêşbaziyê bibe.
5.) Divê beşdar du zerfên cuda ku yek ji bo nivîsara lîstikê û li ser zarfan nasnav/mexlas hebe; divê bi tu awayî navê rastîn li ser zerfan û li ser nivîsara lîstikê tune be.
Jûriya îsal; Dr. Ghotbedîn Sadeghî, Gazî Bamernî, Şaliko Bêkes, Leyla Batgî, Kawa Şêxê ne.
Lîstik divê herî dereng heta êvara 25’ê Adara 2016’an, li ser kaxiz an jî bi formatekî dîjîtal (wekî CD) bi destan bên radestkirin, an jî bi postayê bên şandin.
Navnîşana ji bo başdariyê jî wiha ye; Elazig Cad. Diyarbakir Buyukşehîr Belediyesî Şehîr Tiyatrosu Yenîşehîr/ DIYARBAKIR
(sy)
