Hunermendê NÇM'ê ji bo berxwedana Cizîrê stranek derxist
SÊRT (DÎHA) - Strana hunermendê NÇM'ê Argêş Akan a ku li ser berxwedana Cizîrê hate çêkirin, rastî eleqeyek mezin tê.
Xebatkarê Navenda Çanda Mezopotamyayê (NÇM) ya Sêrtê Argêş Akan li ser bexwedana dîrokî ya Cizîrê stranek derxist. Têkildarî mijarê de Akan diyar kir ku ew wek xebatkarekî hunerê li hemberî hovîtiya dewletê ya li ser Sûr, Cizîr, Hezex û Silopiyayê nedikarî bêdeng bimîne û dest bi xebatek bi vî rengî kiriye. Akan got ku her kesê ku bi hunerê ve têkildare divê li hemberî êşên gelan, berhemên xwe yên hunerî wek çekekî bikarbîne û da zanîn ku şoreş bi hunerê pêkan e. Akan da zanîn ku strana wî ji aliyê gelê kurd ve bi kêfxweşî hatiye pêşwazîkirin û destnîşan kir ku ew jî bi vê eleqeya gelê kurd gelek kêfxweş e. Akan balkişand ser berxwedana dîrokî ya Kobanê û daxuyand ku di vê pêvajoyê de stranên hatin çêkirin û wêneyên hatin xîz kirin ruhekî nû dabû berxwedana gelê kurd.
'Divê hunermend ji Sûrê heta Cizîrê berxwedanê bibînin'
Der barê berxwedana Cizîrê de Argêş Akan got ku tevî tank û topan jî dewleta tirk nekarî vîna gelê Cizîrê dîl bigire û ev tişt anîn ziman: "Ez bang li tevahiya hunermendan dikim ku bila werin Cizîr û Sûrê û hovîtiya li vir pêk hatî bila bi çavên xwe bibînin. Ji bo hunermendên roja me pêdivî bi lêgerînên destanên 5 hezar sal berê tune ye. Ji ber ku di roja me ya îroyîn de li Cizîr, Sûr û Nisêbînê destânên gelek mezin tên nivîsandin. Werin û destanên rêveberiyên cewherî yên gelê kurd bibînin."
Strana Akan bi van rêzikan destpê dike: "Berxwedana Cizîrê li cîhanê deng veda. Botan bûye warê çîçekan û sûrên berxwedanê. Navê destana şopdarên Mazlum Dogan a 'berxwedan jiyane' êdî bûye Cizîra Botan. Ey dîrok destana Cizîra Botan binivîsîne."
(bd/sa)
