Karîkaturîst Încesu: Nedihat bîra min ku ezê êşan xêz bikim
STENBOL(DÎHA) - Karîkaturîst Halîl Încesu anî ziman ku dema dest bi xêzkirina karîkaturan kiriye tu car nehatiye bîra wî ku dê êşê xêz bike û got "Min digot qey ezê tim qerf û henekan xêz bikim. Lê wisa lê nehat. Di vê cîhana ku ewqas êş tê jiyin de ez çawa dikarim şadbûnê xêz bikim."
Şerê ku ji aliyê hikumeta AKP'ê ve hate destpêkirin bandora xwe li ser hemû beşên civakê de dike. Ji rojnamegeran heya xêzkaran gelek kes li ser rastiya şer dinivîse, diafirînê û hewl dide balê bikşîne ser êşên ku tê jiyin. Hikumeta AKP'ê jî ji ber vê rastiyê di demên dawî de herî zêde jî berê xwe dide rojnameger, rewşenbîr û hunermendên ku rexne li desthilatdariyê dikin. Karîkaturîstê Rojnameya Ozgur Gundemê Halîl Încesu ku bi salan e bi karîkatûrên xwe di serî de pirsigirêka kurd balê dikşîne ser rastiyên civakî, bandora şer a li ser çapemeniyê û hunerê nirxand.
'Dê ev şer li derê herkesî bide'
Încesu rewşa li Kurdistanê weke "şerê vekirî" nirxandi û destnîşan kir ku di nav erjengiya şer de qerf jî gelek zor e. Încesu diyar kir ku civaka Tirkiyeyê hê di ferqa encamên şer de nîne û got ku bêxemiya civakê dê rê li ber encamên nebaş veke. Încesu anî ziman ku dewlet di mijara aşitiyê de tu car ne jidil bûye û wiha axivî: "Dema hêzên xwe komî ser hev kir dest bi şer kir. Eger em rê li ber vê negirin dê şer li deriyê me hemûyan bide."
'Di nav ewqas êşî de ezê çawa têbigihêm?'
Încesu da zanîn ku di nav van şert û mercan de xêzkirina karîkaturan jî gelek zehmet e û wiha pê de çû: "Dema laşê Dayika Taybet li ber çavên zarokên wê bi rojan li erdê bimîne, qerf û karîkatur ne hêsan e." Încesu bilêvkir ku dema dest bi xêzkirinê kiriye tu car nehatiye bîra wî ku dê êşê xêz bike û got "Min digot qey ezê tim qerf û henekan xêz bikim. Lê wisa lê nehat. Di vê cîhana ku ewqas êş tê jiyin de ez çawa dikarim şadbûnê xêz bikim." Încesu ji bo karîkaturên xwe jî got "Ev zêmarên ku hatine xêzkirin e. Hun li hemberî van êşan encax dikarin bi xêzkirinên xwe hêrs û bertekên xwe bînin ziman."
'Li hemberî muxalîfan şereke giştî heye'
Încesu destnîşan kir ku rojnameger, akademîsyen, parêzer û hunermendên bertek nîşanî komkujiyan didin rastî zextên desthilatdariyê tên û weke "terorîst" tên binavkirin û wiha berdewam kir: "Ez şaş nabînim ji ber ku dewlet her tim li hemberê kesên serhildêr zextên giran pêk anîne. Îro li Tirkiyeyê li hemberî muxalîfan şereke giştî heye."
Încesu têkîdarî karîkatura xwe ya ku di 8'ê Adarê de li Rojnameya Ozgur Gundemê hate weşandin û êrîşên lîncê ku hate destpêkirin jî axivî û got karîkutura wî li hemberî feraseta tacîz û tecawizê bûye lê ji bo were bêdengkirin bi zanebûn hatiye bikaranîn.
(sy)
