'Ligel êrîşan em ê xebatên çanda azad bidomînin'
AGIRÎ (DÎHA) - Xebatkarê Navenda Çandê ya Semayê Avşîn Aslan diyar kir ku her çend di demên dawî de tên hedefgirtin û rastî pêkûtiyan tên jî dê ji bo afirandina jiyaneke azad xebatên çanda azad bidomînin.
Li Agiriya ku di demên dawî de herî zêde operasyonên qirkirina siyasî pêk hatin û zêdetirî 50 siyasetmedar hatin girtin de yek jê hedefa hêzên dewletê Navenda Çanda Semayê ye. Di operasyonên qirkirina siyasî de heya niha tê de solîstê muzikê, mamosteyê erbaneyê, xebatkarên kafeteryayê jî heyî bi giştî 5 xebatkarên Navenda Çanda Semayê ku di bin banê şaredariyê de xebatên çand û hunerî dide meşandin û ji aliyê gel ve rastî eleqeyek mezin tê hatin girtin. Herî dawîn jî di serdegirtina polîsan a saziyê de kesê bi navê T.Y. ji aliyê hêzên dewletê ve wek "bombeyê zindî" hat nîşandan û navenda çandê xwestin bikin navenda hedefa xwe.
'Çavtirsandin têrê nekirn, propagandaya qirêj dest pê kirin'
Derbarê girtin û binçavkirina xebatkaran de mamosteyê Navenda Çandê Avşîn Aslan axivî û diyar kir ku ew xebatên xwe di çarçoveya çand û zimanê kurdan ku herî zêde hatiye pişavtin de didomînin. Aslan destnîşan kir ku ji ber vê sedemê jî ji her aliyê ve zext û êrîş li hember saziya wan ve tê meşandin û wiha got: "Saziyên dewletê di destpêkê de ji bo vala derxistina xebatên me heman xebat dan meşandin. Lê tişta ku dixwestin pêk nehat. Vê carê dest bi êrîşên qirêj kirin. Ji bo xebatên me reş bikin û çavên şagirtinên me bitirsînin jî dest bi propagandeyekê qirêj kirin. Lê ligel van jî gel li pişt me ye û alîkariya me dike."
'Wekî berxwedana girtîgehan berxwedan derve jî bidome'
Aslan da zanîn ku yekane armanca dewletê astengirina jiyîna çanda kurdewar û hînbûna ziman e û piştî êrîşan derbarê xebatan de ev agahî dan: "Niha derdora 450 xwendekaran serî li me daye û li gel çavtirsandin û êrîşan jî ev hêjmar zêdetir bû. Çawa ku hevalên me di girtîgehan de li ber xwe didin û serî natewînin em ê li derve ji bo jiyîna çand û ziman xebatên xwe bidin meşandin."
'Bi hevgirtinê êrîş dê paşve bimînin'
Aslan anî ziman ku êrîşên li hember Kurdistanê tên meşandin ne yê yekemîn ne jî yên dawî in û wiha berdewam kir: "Em jî ne neferê yekemîn ne jî yên dawîn in. Bi hevgirtin û yekitiyê em ê van êrîşan li pey xwe bihêlin û ji bo afirandin jiyaneke azad xebatên çanda azad bidomînin."
(gka)
