'Em dest ji koçerî û sewalên xwe bernadin'
WAN (DÎHA) -Koçerên herêma Wanê bertek nîşanî "Herêmên Ewlehiya Taybet" ku hatine xedexekirin dan û diyar kirin her çendî zozan û mêrgên wan bên qedexekirin jî dest ji koçerî û sewalên xwe bernadin.
Hêzên dewletê bi hinceta "Herêmên Ewlehiya Taybet" zozan, mêrg û çiyayê Kurdistanê li welatiyan qedexe dike. Li dijî qedexeyan bertek û nerazîbûn jî zêde dibin. Hêzên dewletê Zozanên herêma Nedîrokê yê navçeya Elbaka Wanê li koçer û welatiyan qedexe kir. Welatiyan bertek nîşanî qedexe û astengiyan dan. Koçeran, anîn ziman ku çendî qedexe hebe jî dest ji koçerî û sewalkariyê bernadin. Koçerê bi navê Îzzettin Gunbay, diyar kir ku di demsamla baharê de ji Elihê hatine û di demsala payizê de dîsa vedigerin Êlihê û wiha got: "Em debara xwe û jiyana xwe bi çanda koçeriyê derbas dikin. Em dernekevin zozanan em nikarin debara xwe û jiyana xwe berdewam bikin. Koçerî û zozan perçeyekî jiyana me ye. Çendî qedexe û astengî hebin jî em dê dîsa koçerî, sewalkarî berdewam bikin û me dê dîsa sewalan xwedî bikin.
Koçer Gunbay, da zanîn ku her sal berî sewalên xwe derxin zozanan bêtaran bi daxwaz û destûra Wezîrê Çandinî û Sewalkariyê îlac ji wan re dişand û sewalên xwe derzî dikirin û wiha got: "Lê îsal bêtar bi hinceta zozan û herêm hatine qedexekirin nayên vir. Gunbay, da zanîn ku her çend qedexe hebin jî ew dê bên vir û koçeriya xwe berdewam bikin:"
Koçerê bi navê Halit Gunbay jî anî ziman ku ew qedexe û dorpêçê naxwazin û wiha got: "Em li şûna şer û qedexeyan aştî, wekhevê û biraytiyê dixwazin. Ji ber ku bi girtin û kuştinê nikarin kurdan xelas bikin. Çend me qetil bikin em dê bêtir zêde bibin. Ew çi bikin bila bikin em dest ji vê koçeriya xwe bernadin."
(mae)
