Heyet li gel astengiyan jî dîsa gihişt malbatên Avgamasya
ŞIRNEX (DÎHA) - Hevseroka KCD'ê Leyla Guven û Hevseroka Giştî ya DBP'ê Sebahat Tuncel, li gel hemû astengiyên leşkeran xwe gîhandin malbatên li gundê Avgamasya ku di konan de dijîn.
Heyeta KCD û DBP'ê ku di navde Hevseroka KCD'ê Leyla Guven û Hevseroka Giştî ya DBP'ê Sebahat Tuncel jî heye çûn Şirnexê. Li bajarê Şirnexê di 14'ê Adarê de "Qedexeya Derketina Kolanan" hat îlankirin û 9 mehin welatî nikarin biçin tax û kolankên xwe. Welatiyên ku dewletê di rîşan de bi tang, top û kepçeyan xaniyên wan xera kir û bi zora şer ew ji Şirnexê koç kirin, ji ber qedexeya li tax û bajar berdewam dike nikarin vegerin warê xwe. Welatiyên ku warê xwe terk nakin li der û dorên Şirnexê di konan de bi cih bûn. Duh polîs çûn gundên Avgamasya ku nêzî 200 malbat di konan de bicih bûne û êrîşî welatiyan kir. Polîsan duh ji welatiyan xwest konê xwe rakin û îro dîsa êrîşî welatiyan kiribûn. Welatiyan îro jî li dijî êrîşên polîsan di ber xwe dan. Piştî êrîşa polîsan heyeta KCD, DBP, HDK û HDP'ê çûn Avgamasya. Heyet li gel hemû astengiyên polîs û leşkeran xwe gîhandin gund. Hevseroka KCD'ê Leyla Guven, Hevseroka Giştî ya DBP'ê Sebahat Tuncel, wekîlên HDP'ê Besime Konca û Ali Atalan jî di navde gelek rêveber çûn Dêrgulê û ji wir ji derbasî Avgamasya bûn. Heyetê ewil li Bajaroka Dêrgulê li welatiyan guhdar kir û piştre derbasî Avgamasya bûn. Heyet li Qereqola Cendirmeyan a Îkizce demekê hatin rawestandin û piştî demek dirêj hatin rawestandin di gundê Mendîkêra re derbasî Avgamasya bûn. Heyeta ku dîsa rastî konrola leşkeran hat, li gel hemu astengiyan bi meş xwe gîhand gundê Avgamasya.
(mae)
